மலேசியாவிலிருந்து 2026-ம் ஆண்டுக்கான ஹஜ் புனிதப் பயணத்தைத் தொடங்கும் வகையில், இன்று முதல் குழுவினர் சவுதி அரேபியாவுக்குப் புறப்பட்டுள்ளனர்.
மலேசியாவின் 1447H/2026-ம் ஆண்டுக்கான ஹஜ் பயணத்தின் முதல் குழு, இன்று ஏப்ரல் 18, 2026 அதிகாலை 4:05 மணிக்கு கோலாலம்பூர் சர்வதேச விமான நிலையத்திலிருந்து (KLIA) சவுதி அரேபியாவுக்குப் புறப்பட்டது. மொத்தம் 284 பயணிகள் கொண்ட இந்தக் குழு, மலேசியா ஏர்லைன்ஸ் நிறுவனத்தின் MH8050 சிறப்பு விமானம் மூலம் மதீனாவுக்குப் பயணித்தனர். இந்த ஆண்டு மலேசியாவிலிருந்து மொத்தம் 31,600 பயணிகள் ஹஜ் கடமையை நிறைவேற்றச் செல்ல உள்ளனர். இதற்காக மலேசியா ஏர்லைன்ஸின் ‘அமல்’ (Amal) பிரிவு மற்றும் சவுதி ஏர்லைன்ஸ் இணைந்து சுமார் 100 பட்டய விமானங்களை (Chartered flights) இயக்கத் திட்டமிட்டுள்ளன. பயணிகளின் வசதிக்காக நாடு முழுவதும் கோட்டா பாரு, ஜோகூர் பாரு உள்ளிட்ட 8 இடங்களில் தங்கும் நிலையங்கள் அமைக்கப்பட்டுள்ளன. ஹஜ் பயணிகளின் விசா மற்றும் மருத்துவப் பரிசோதனைகளை மலேசியாவிலேயே முடித்துக்கொள்ளும் ‘மக்கா ரூட்’ (Makkah Route) திட்டத்தின் கீழ் இந்தப் பயணம் மிகவும் எளிமையாக்கப்பட்டுள்ளது. முதல் குழுவினரை வழியனுப்பி வைத்த பிரதமர் அன்வர் இப்ராஹிம், பயணிகள் நலமுடனும் பாதுகாப்புடனும் திரும்பத் தனது பிரார்த்தனைகளைத் தெரிவித்துள்ளார். ஏப்ரல் 18 முதல் மே 20 வரை இந்தப் பயணக் கட்டங்கள் தொடரும் என்றும், ஹஜ்ஜின் முக்கிய நிகழ்வான அரஃபா (Wukuf) தினம் மே 26 அன்று அமையும் என்றும் எதிர்பார்க்கப்படுகிறது.
About the Author
