மக்களே இலவசங்கள் வேண்டாம் என்கிற காலம் வந்தால் தான் கடன் சுமையில் இருந்து நாம் மீளமுடியும் என சரத்குமார் கருத்து தெரிவித்துள்ளார்.
நடிகர் சரத்குமார் சமத்துவ மக்கள் கட்சியை நடத்தி வருகிறார். கடந்த காலங்களில் அதிமுக கூட்டணியில் தான் சமத்துவ மக்கள் கட்சி பல முறை அங்கம் வகித்துள்ளது. 2011 சட்டமன்றத் தேர்தலில் அதிமுக கூட்டணியில் சமக சார்பில் தென்காசி தொகுதியில் போட்டியிட்டு வென்றார் சரத்குமார். 2016 சட்டமன்றத் தேர்தலில் அதே அதிமுக கூட்டணியில் திருச்செந்தூர் தொகுதியில் நின்று தோல்வி அடைந்தார்.
எனினும் சமத்துவ மக்கள் கட்சிக்கு மக்களவைத் தேர்தலில் இதுவரை களம் காணவில்லை. 2019 மக்களவைத் தேர்தலில் அதிமுகக்கு ஆதரவு தெரிவித்து இருந்தது. தற்போது மக்களவைத் தேர்தலுக்கான கூட்டணி பேச்சுவார்த்தைகள் நடைபெறும் நிலையில், சமக எந்த கூட்டணியில் இடம்பெறும் என்ற எதிர்பார்ப்புகள் எழுந்துள்ளன.
இந்த நிலையில் செய்தியாளர்களிடம் பேசிய சரத்குமார், “மக்களவைத் தேர்தல் கூட்டணி தொடர்பாக திமுகவைத் தவிர அதிமுக மற்றும் பாஜக கட்சிகளின் தலைவர்கள் எங்களை அணுகி பேசியுள்ளனர். ஏற்கனவே நடைபெற்ற எங்கள் கூட்டத்தில் ஒருமித்த கருத்து எட்டப்படவில்லை. கூட்டணி தொடர்பாக நாங்கள் எடுக்கும் முடிவு சிறப்பாக இருக்க வேண்டும். இன்னும் இரண்டு அல்லது மூன்று நாட்களில் கூட்டணி தொடர்பாக நல்ல முடிவு எடுக்கப்படும்” என்று தெரிவித்தார்.
About the Author
