நாகி ரெட்டி அவர்களின் 110 வது ஜனன தினம்

இந்திய சினிமா வரலாற்றில் பெரும்பங்களிப்பாற்றிய விஜயா வாஹினி  ஸ்டுடியோ அதிபரும்,சினிமா தயாரிப்பாளருமான அமரர் திரு.நாகி ரெட்டி அவர்களின் 110 வது ஜனன தினம் இன்று….! இந்திய சினிமா வளர்ச்சிக்கு தமிழகம் பெரும் வித்திட்ட அன்றைய காலங்களில் மலையாளம்,ஆந்திரம்,கன்னடம்  போன்ற மொழிகளில் திரைப்படங்கள் தயாரிப்பதற்கான சகல வசதிகளையும்,ஆளுமையையும்  தன்னகத்தே கொண்டிருந்தது சென்னை. அக்காலகட்டத்தில் ஏவியெம்,கற்பகம்,சாரதா,தேவர் ஃபிலிம்ஸ் என பல ஸ்டுடியோக்களுக்கு மத்தியில் பல பிரமாண்டமான திரைப்படங்களை உருவாக்கிய வரலாறு படைத்த ஸ்டுடியோ விஜயா வாஹினி. இதன் அதிபரான திரு .பி.நாகி ரெட்டி என்ற பொம்மி நாகி ரெட்டி அவர்களின் 110 வது ஜனன தினம் இன்றாகும்.ரெட்டி அவர்கள் டிசம்பர் 2.1912 அன்று ஆந்திராவில் கடப்பா மாவட்டத்தில்பொட்டிம்பாடு கிராமத்தில் பிறந்தார்.  இவர் ஒரு திரைப்படத் தயாரிப்பாளர், பத்திரிகையாளர், தொழிலதிபர் மற்றும் சமூக சேவகரும் ஆவார்.வெங்காய ஏற்றுமதியாளராக வாழ்க்கையைத் தொடங்கிய நாகிரெட்டி, தென்கிழக்கு ஆசியாவிலேயே பிரமாண்டமான விஜயா- வாகினி ஸ்டூடியோவை உருவாக்கினார். பாதாள பைரவி, மிஸ்ஸியம்மா,மாயா பஜார்,நம் நாடு, எங்கவீட்டுப்பிள்ளை,வசந்தமாளிகை,வாணி ராணி,உழைப்பாளி  உட்பட 50 வெற்றிப் படங்களைத் தயாரித்தவர். இவரது குடும்பம் பிறகு சென்னைக்கு  குடியேறிய பின் இவருடைய தந்தை, வெளிநாடுகளுக்கு வெங்காயம் முதலான விவசாய விளைபொருட்களை ஏற்றுமதி செய்து வந்தார். இந்த தொழிலில் நாகிரெட்டி தமது 18-வது வயதில் ஈடுபட்டார். ஒரு முறை, வெங்காயம் ஏற்றிச்சென்ற கப்பல் கடலில் மூழ்கியதால் நட்டம் ஏற்பட்டது. எனவே ‘பி.என்.கே’ என்ற அச்சகத்தை தொடங்கினார். ‘ஆந்திரஜோதி’ என்ற தெலுங்கு மாத இதழைத் தொடங்கினார். நாகிரெட்டியின் மனைவி பெயர் சேசம்மா. வேணுகோபாலரெட்டி, விசுவநாத் ரெட்டி, வெங்கட்ராம ரெட்டி என்ற 3 மகன்களும் ஜெயம்மா, சாரதா என்ற 2 மகள்களும் உள்ளனர்.குழந்தைகளுக்காக தெலுங்கில் ‘சந்தமாமா’ என்ற சிறுவர் இதழைத் தொடங்கினார். இது பின்னர் ‘அம்புலிமாமா’ என்ற பெயரில் தமிழில் வெளியிடப்பட்டது. அது வெற்றியடையவே, பல்வேறு மொழிகளிலும் வெளியாயிற்று. ஆந்திராவைச் சேர்ந்த சக்ரபாணி என்ற எழுத்தாளர் அம்புலிமாமா இதழில் கதை எழுதி வந்தார். அப்போது நாகிரெட்டியுடன் அறிமுகம் ஏற்பட்டது. இருவரும் நெருங்கிய நண்பர்கள் ஆனார்கள். இருவரும் சினிமாத்துறையில் ஈடுபட விரும்பினர். அப்போது மூல நாராயண சுவாமி என்பவர் நடத்தி வந்த வாஹினி ஸ்டுடியோஸ் கடும் நெருக்கடியிலிருந்ததை அறிந்து அதை குத்தகைக்கு எடுத்து நடத்த ஆரம்பித்தனர். பின்னர், தன்னுடைய விஜயா புரொக்டக்சன்ஸ்ஸையும் சேர்த்து வடபழனி அருகே நிலம் வாங்கி, “விஜயா-வாஹினி ஸ்டுடியோ” என்ற பெயரில் படபிடிப்பு அரங்கத்தைத் தொடங்கினார்கள்.இங்கு தயாரான படங்கள் வெற்றிகரமாக ஓடின. நாகிரெட்டியின் மகள் பெயர் விஜயா. அவர் பெயரால் ‘விஜயா புரொடக்ஷன்ஸ்’ என்ற திரைப்படத் தயாரிப்பு நிறுவனத்தை நாகிரெட்டியும், சக்ரபாணியும் தொடங்கி, ‘பாதாள பைரவி’ என்ற படத்தைத் தயாரித்தனர். என். டி. ராமராவ், கே. மாலதி, கிரிஜா, எஸ். வி. ரங்காராவ் ஆகியோர் நடித்த இந்தப்படம், தமிழிலும், தெலுங்கிலும் ஒரே சமயத்தில் தயாராகியது. தமிழ்ப்படத்துக்கான வசனத்தையும், பாடல்களையும் தஞ்சை ராமையாதாஸ் எழுதினார்.இசை கண்டசாலா 17-5-1951-ல் வெளியான ‘பாதாள பைரவி’ தமிழ், தெலுங்கு இரண்டு மொழிகளிலும் வெற்றிப்படமாக அமைந்தது. பிறகு ‘கல்யாணம் பண்ணிப்பார்’ என்ற படத்தை நாகிரெட்டியும், சக்ரபாணியும் தயாரித்தனர். இந்தப் படத்தில் என்.டி.ராமராவ், ஜி.வரலட்சுமி ஜோடியாக நடித்தார்கள். சிறிய வேடங்களில் நடித்து வந்த சாவித்திரி, இப்படத்தில் இரண்டாவது கதாநாயகியாக நடித்துப் புகழ் பெற்றார்.அடுத்து ஜெமினிகணேசன் -சாவித்திரி இருவரும் இணைந்து நடித்த ‘குணசுந்தரி’ (1954), ‘மிஸ்ஸியம்மா’ (1955) ஆகிய படங்கள் விஜயா புரொடக்ஷன்ஸ் வெளியிட்டது. இதில் ‘மிஸ்ஸியம்மா’ மாபெரும் வெற்றிப்படமாக அமைந்தது. பிறகு 10 ஆண்டுகள் தமிழ் படம் எதையும் நாகிரெட்டி தயாரிக்கவில்லை. 1965-ல் எம்.ஜி.ஆர்- சரோஜாதேவியை வைத்து, ‘எங்கவீட்டுப் பிள்ளை’யை தயாரித்தார். சக்திகிருஷ்ணசாமி வசனம் எழுத, சாணக்யா இயக்கினார். படம் மிகப்பெரிய வெற்றி பெற்றது. இந்தப்படத்தை தெலுங்கு, இந்தி ஆகிய மொழிகளிலும் தயாரித்தார்.ஹிந்தி படத்தில் திலீப்குமார் கதாநாயகனாக நடித்தார். இந்தப்படம், வடநாட்டில் பல ஊர்களில் வெள்ளி விழா கொண்டாடியது. பிறகு எம்.ஜி.ஆர் – ஜெயலலிதா நடித்த ‘நம் நாடு’ படத்தை 1969-ல் வெளியிட்டார். இந்த படமும் வெற்றிப் படமாகும். 1974-ல் சிவாஜிகணேசன் – வாணிஸ்ரீ நடித்த ‘வாணி ராணி’ படத்தையும் தயாரித்தார். தமிழ், இந்தி உள்பட பல மொழிகளில் 50-க்கும் மேற்பட்ட சினிமா படங்களை தயாரித்தார். நடிகர் திலகம் சிவாஜி கணேசனின் இமாலய வெற்றி பெற்ற “வசந்தமாளிகை”விஜயா வாஹினி தயாரிப்பே. வாஹினி ஸ்டூடியோவின் பெயர், விஜயா -வாஹினி ஸ்டூடியோ என்று பிறகு மாறியது.தென்கிழக்கு ஆசியாவிலேயே பெரிய ஸ்டூடியோவாக இது திகழ்ந்தது. இந்த ஸ்டூடியோவிலும், நாகிரெட்டி தயாரித்த படங்களிலும் சக்ரபாணி பங்குதாரராக இருந்தார். சிறந்த நட்புக்கு எடுத்துக் காட்டாக இவர்கள் விளங்கினார்கள். அக்காலத்தில் தமிழ், தெலுங்கு, மலையாளம், கன்னடம் ஆகிய நான்கு மொழிப்படங்களும் சென்னையில்தான் தயாரிக்கப்பட்டன. ஸ்டூடியோக்கள் சென்னையில்தான் இருந்தன. ரஜினிகாந்த் நடித்த உழைப்பாளி படமும் விஜயா ஸ்டுடியோ தயாரித்ததே. ஆந்திராவில் ஒரு ஸ்டூடியோ கூட கிடையாது. ஆந்திராவில் முதல்-மந்திரிகளாக இருந்த சஞ்சீவரெட்டி, பிரமானந்தரெட்டி ஆகியோர், ‘உங்கள் ஸ்டூடியோவை ஆந்திராவுக்கு கொண்டுவந்து விடுங்கள். எல்லா வசதிகளும் செய்து தருகிறோம்’ என்று அழைத்தார்கள்.ஆனால், நாகிரெட்டி மறுத்துவிட்டார். ‘தமிழ் மண்தான் என்னை வாழவைத்தது. கடைசி மூச்சு உள்ளவரை தமிழ்நாட்டில்தான் வாழ்வேன்’ என்று கூறிவிட்டார். திரைப்படத் தயாரிப்பு முறையில் மாற்றங்கள் ஏற்பட்டு, பட அதிபர்கள் வெளிப்புறக் காட்சிகளை அதிகம் படமாக்கத்தொடங்கவே, ஸ்டூடியோக்களில் வேலை குறைந்தது. இதனால் ஸ்டூடியோக்களை நடத்த முடியாமல், ஒவ்வொரு ஸ்டூடியோவாக மூடப்பட்டு வந்தன. நாகிரெட்டி, தன் ஸ்டூடியோவை மக்களுக்கு பயனுள்ள முறையில் மாற்ற விரும்பினார்.ஸ்டூடியோ இருந்த இடங்களில் விஜயா மருத்துவமனை, விஜய ஷேஷ மஹால் திருமண மண்டபம் ஆகியவற்றைக் கட்டினார். தென்னிந்தியத் திரைப்பட வர்த்தக சபைத் தலைவர், இந்திய திரைப்படக் கழகத் தலைவர் போன்ற பதவிகளை பல முறை வகித்தவர் நாகிரெட்டி. 2 பல்கலைக்கழகங்கள் நாகிரெட்டிக்கு டாக்டர் பட்டம் வழங்கின. பக்கவாத நோயால் பாதிக்கப்பட்ட நாகிரெட்டி தனது நினைவாற்றலை இழந்தார். 25-2-2004 அன்று சென்னையில் நாகிரெட்டி தனது 92 வது வயதில்  மரணம் அடைந்தார்.நாகி ரெட்டி பெற்ற விருதுகள்:கலைமாமணி விருது 1972 – 1973தாதாசாகெப் பால்கே 1981…. ஆக்கம்:எஸ்.கணேசன் ஆச்சாரி சதீஷ் கம்பளை இலங்கை. “இந்திய சினிமா சரித்திரத்தில் நாகி ரெட்டி ஓர்                             சகாப்தம் “