எஸ்.ஆர்.ராஜா எம்எல்ஏ பிரசாரம்

ஸ்ரீபெரும்புதூர் தொகுதியில் திட்ட பணிகள் தொடர டி.ஆர்.பாலுவுக்கு வாக்களிக்க வேண்டும்:

தாம்பரம், ஏப்.15: ஸ்ரீபெரும்புதூர் நாடாளுமன்ற தொகுதி திமுக வேட்பாளர் டி.ஆர்.பாலுவை ஆதரித்து தாம்பரம் எம்எல்ஏ எஸ்.ஆர்.ராஜா நேற்று செம்பாக்கம் தெற்கு பகுதி மற்றும் சிட்லபாக்கம் பெரிய ஏரிக்கரையில் நடைபயிற்சியில் ஈடுபட்ட பொதுமக்களை நேரில் சந்தித்து வாக்கு சேகரித்து பேசியதாவது: கடந்த 3 ஆண்டுகால திமுக ஆட்சியில் தாம்பரம் சட்டமன்ற தொகுதியில் எண்ணற்ற பணிகள் நடைபெற்று உள்ளது. தாம்பரம் சானிடோரியத்தில் 450 மகளிர் தங்கக்கூடிய அளவில் குளிர்சாதன வசதியுடன் கூடிய விடுதி ரூ.18 கோடியில் கட்டப்பட்டு பயன்பாட்டில் உள்ளது.

ரூ.132 கோடியில் நவீன மருத்துவ வசதிகளுடன் தாம்பரம் அரசு மருத்துவமனை அமைக்கும் பணிகள் நடைபெற்று வருகிறது. ரூ.2 கோடியே 80 லட்சத்தில் தொகுதி முழுவதும் தெருக்களின் புதிய பெயர் பலகைகள் அமைக்கப்படுகிறது. தாம்பரம் ரயில்வே நிலையத்தை 3வது பெரிய ரயில்வே முனையமாக மாற்றியது மற்றும் தேஜாஸ் விரைவு ரயில் தாம்பரத்தில் நின்று செல்ல ஏற்பாடு செய்யப்பட்டுள்ளது.

ரூ.30 கோடியில் தொகுதி முழுவதும் எல்இடி தெரு விளக்குகள் அமைக்கப்பட்டுள்ளது. தாம்பரம் சட்டமன்றத் தொகுதி, தாம்பரம் மாநகராட்சி திட்டம் மற்றும் பொது நிதிகள் மூலம் ரூ.168 கோடியே 2 லட்சத்தில் சாலை உள்ளிட்ட பல்வேறு பணிகள் நிறைவேற்றப்பட்டுள்ளது. தாம்பரம் சட்டமன்றத் தொகுதியில் கடந்த 3 நிதி ஆண்டுகளில் ரூ.1 கோடியே 22 லட்சத்து 30 ஆயிரம் மதிப்பீட்டில் 11 நியாய விலை கடைகள் கட்டப்பட்டுள்ளது.